Версия для печати

Икона Свв. Отцов-Исповедников Русской Церкви Катакомбной,

написанная в Леснинской обители во Франции к прославлению на Освященном Соборе РИПЦ

Служба

Собору Святых Отец  Исповедник Церкве Катакомбныя

На «Господи Воззвах»

Глас 6-й, подобен «Вся отложивше»

Все отложивше житейское попечение, и Христа возлюбивше паче живота своего, о подвижницы катакомбныя, молитвеницы о Церкви Русской и блюстители чистоты веры православной, како возможем достойно воспети подвиги и труды ваша! Вы бо проидосте сквозе огнь и воду, претерпевше скорби и лишения, крест свой взясте, яко иго Божественное, приидите среди нас невидимо, предначинающих торжество и пение, и ваш праздник совершающих святолепно.

Все отложивше о земных попечение, и сладость текущую презревше, страстей мучительство далече от себе отринувше, катакомбнии отцы Богомудрии, просветистеся благодатию, и путь узкий и правый нам указавше, в последняя времена наставляюще к тихому пристанищу в ограде Церковней, от пути же пагубнаго, широкаго и пространного возбраняюще, да не погибнем нерадевше о спасении душ наших.

Всем сердцем болезнуя о церковной правде, путем трезвения духовнаго, благоговения, таин Божиих созерцания, чертога небесного достигли есте. Деяньми вашими и скорбей терпением Церковь украшается, чистотою исповедания нечестие посрамляется, словесами и трудами вашими вера утверждается. Темже молим вы, всечестнии отцы, руководствуйте в наших обстояниих нас, да вами наставляеми и заступаеми, Царствия Небеснаго сподобимся.

Отче святителю Петре, на горе Афонстей подвизавыйся, в лютую же годину во oтечество возвративыйся, возглавил осиротевшую паству истинно-правоcлавных хриcтиан, лишения и гонения терпев многи: ныне же в белых ризах у Преcтола Божия предстоиши со многими подвижники и исповедники российских катакомб, молися о душах наших.

Глас 5-й подобен «Радуйся»

Радуйся и веселися, Святая Церковь, обретши новых заступников и поборников, укрепляющих гонимую Церковь нашу, победы дающую верным! Радуйся, Святителю Тихоне, на путь исповедничества их наставивый! Радуйтеся, новомученицы святителие Кирилле и Иосифе, пророков и апостолов ревность показавшии! Радуйся, весь сонм отец катакомбных, ибо высоты премудрости Божия уразумели есте! Любовию же Христу сраспялися есте, и свойствении ему бысте. Вразумите убо и нас, отцы святии, и подадите нам от благостыни вашея, да будет в Господе вся наша надежда и утверждение.

Радуйся, Церковь Русская, ибо лик святых твоих на небесех умножися сонмом исповедник катакомбных и стоятелей за Церковь Истинную! Радуйтеся, и вы, предстателие наши, ныне нами прославляемии! Радуйтеся, небеснии жителие, духовнаго делания трудницы! Радуйтеся, праведницы, смиренномудрия исполнении, и гордых мiра сего обличителие, на землю милостивно призиравшии, и молитвы певцев ваших приимшии! Непрестанно молитеся ко Господу, о еже спастися нам.

Приидите, о празднолюбцы, возвеличим учители и наставницы наша! Вы бо пастырие милосерднии, сердцем веровали есте в правду и устами глаголали есте во спасение: кто ны разлучит от любве Божия; скорбь ли, или теснота, или гонения; яко Тебе ради умерщляеми есмы весь день, вменихомся яко овцы заколения. Но во всех сих препобеждаем за возлюбльшаго ны! Темже и во след вам мы возопиим: ни ина тварь кая возможет нас разлучити от любве Божия, яже о Христе Иисусе Господе нашем.

Приидите празднолюбцы, в молитвах прославим исповедников, таинственныя Церкве ревнителей, иже, яко древле, в катакомбах подвизавшихся, по благословению святителей Тихона, Петра, Кирилла и Иосифа, Димитрия, Феодора, Павла и Серафима, Сергия, Алексия и Андрея, Никиты, Максима, Петра и Дамаскина, oбаче любве Хриcтовы ради не убояшася заточения и смерти, ни безбожных, ниже сергиан соблазны славы уязвишася; Хриcта возлюбльших паче живота и многи чада на исповедание подвигших: ныне молятся о душах наших.

Слава, Глас 3-й

Взыграйте, горы российстии, и вся древа дубравная, ликуйте грады и селения, хваляще новоявленныя святыя наша! Яко, течение совершивше, веру сохранили есте. Источницы благочестия являются, и путеводителие к небеси святии сродницы нам бывают. Вы бо приясте от Бога победы венцы, Егоже молите от бед и скорбей избавитися верою совершающим всечестную память вашу.

И ныне, глас тойже: Како не дивимся…

Вход. Прокимен дне и чтения три:

Бытия чтение:

Аврам вселися в земли Ханаанстей: Лот же вселися во граде окрестных стран, и вселися в Содоме. Человецы же сущии в Содоме зли, и грешни пред Богом зело. Бог же рече Авраму, повнегда разлучитися Лоту от него: воззри очима твоима, и виждь от места, идеже ты ныне еси, к северу, и югу, и к востоку, и западу. Яко всю землю, юже ты видиши, тебе дам ю, и семени твоему во веки. И сотворю семя твое яко песок земный: аще кто может исчести песок земный, то и семя твое изочтет. Востав пройди землю в долготу ея, и в широту, яко тебе дам ю, и семени твоему во век. И отселився Аврам, пришед вселися у дуба мамврийскаго, иже бяше в Хевроне: и созда ту жертвенник Господу.   

Премудрости Соломоновы чтение:

Праведных души в руце Божией, и не прикоснется их мука. Непщевани быша во очесех безумных умрети, и вменися озлобление исход их, и еже от нас шествие сокрушение, они же суть в мире. Ибо пред лицем человеческим аще и муку приимут, упование их безсмертия исполнено. И вмале наказани бывше, великими благодетельствовани будут, яко Бог искуси я и обрете их достойны Себе. Яко злато в горниле, искуси их и, яко всеплодие жертвенное, прият я. И во время посещения их возсияют, и яко искры по стеблию, потекут. Судят языком, и обладают людьми, и воцарится Господь в них во веки. Надеющиися нань разумеют истину, и вернии в любви пребудут Ему, яко благодать и милость в преподобных Его и посещение во избранных Его.

Соборнаго послания Иоаннова чтение:

Возлюбленнии, аще кто речет, яко люблю Бога, а брата своего ненавидит, ложь есть: ибо не любяй брата своего, егоже виде, Бога, Егоже не виде, како может любити; И сию заповедь имамы от Него, да любяй Бога любит и брата своего. Всяк веруяй, яко Иисус есть Христос, от Бога рожден есть: и всяк любяй рождшаго любит и рожденного от Него. О сем вемы, яко любим чада Божия, егда Бога любим и заповеди Его соблюдаем. Сия бо есть любы Божия, да заповеди Его соблюдаем: и заповеди Его тяжки не суть. Яко всяк рожденный от Бога побеждает мiр: и сия есть победа, победившая мiр, вера наша. Кто есть побеждаяй мiр, токмо веруяй, яко Иисус есть Сын Божий.

На Литии, Глас 2-й:

Егда заключени бысте от богоборцев наставницы наши, велию радость имели, егда службу Божию совершали есте, понеже в сердцах ваших чад своих вмещали есте, скорбящаго утешая и неутешному соскорбя, о заблуждающих печалуя, клевету и неправду кротко снося, о правой вере ревнуя, призывающе почитати помазанника Божия, за веру Христову пострадавшаго, темже молите Всемилостиваго Бога, да помилует нас и подаст нам крепость подражатели вашими быти.

Воспеваем вас, исповедницы и подвижницы многострадальныя Церкве Катакомбныя, возлюбили бо путь крестный, узкий и прискорбный, терпящии кротко клевету забывших Бога и уготовляющии себе к мучению за Христа. Подадите нам от благодатных даров Ваших, научите дерзновению и вере, да устоим в последняя времена и антихриста не устрашимся.

Слава, Глас 8-й:

Что вас наречем, о исповедницы: Херувимы ли, яко на вас почил есть Христос. Серафимы ли, яко непрестанно прославляете Его. Апостоли ли, яко проповедасте любы Его. Пророрцы ли, яко дерзновенно воспеваете Его. Многия ваша труды и болезни, но большая дарования. Молите спастися душам нашим. 

И ныне, Глас тойже:

Владычице, прими молитвы раб твоих и избави нас от всякия нужды и печали.

Стихиры на стиховне, Глас 2-й, подобен «Егда от древа»:

Егда токмо за имя Христово мнози на Руси от безбожных люте пострадаша, не отвергли вы пастырскаго служения, но отвергли лукавое согласие между Церковию и велиаром, глаголя в себе: будем мудри, яко змии, и цели, яко голубие, да не отдадим Христовых овец в посмех диаволу на поругание вечное.

Стих: Бог нам прибежище и сила, помощник в скорбех, обретших ны зело.

Не послушаша решений Собора Всероссийскаго, тяжко согрешили мнози, иже жизнь церковную по похотям мiра потщалися устрояти. Сим буйим вы противостали есте, сего ради вопием вам: что бы ныне была Святая Церковь Русская, аще подвиг ваш не бысте совершили, о исповедницы чуднии.

Стих: Господи сил, с нами буди, Заступник наш Бог Иаковль.

Не может град укрытися, верху горы стоя, рече Господь, вы же, о смиренномудрии, не верху горы, но в подвалех и иных местех потаенных службу Божию совершая, были есте яко светильницы на свещнице, ибо видя тайная Отец Небесный воздает явная. Сего ради не можете есте укрытися от славословий наших, обаче столпы путеводнии есте нам в пустыне нечестия.

Слава, Глас 8-й, подобен «О Преславнаго Чудесе»

О, Преславнаго чудесе! На небеси и на земли радость днесь возсия в память святых подвижник катакомбных: от Ангел хвалами венчаются, и от человек пения приемлют. О како во стране нашей истина утверждается, о како святыя сия Богу угодиша, имиже враг паде лукавый, Христу побеждшу того.

И ныне, Глас и подобен тойже:

О Преславнаго Чудесе! Небесе и земли Царица от святых сродников наших умоляемая, доныне землю Русскую покрывает! И лика Своего изображением милостивно обогощает. О Владычице Иверская Благоухающая! Не престани и на будущее время, во утверждение на Руси православия, милости и чудеса изливати до века, аминь.

Тропарь, Глас  4-й:

Дивное духовное соцветие – / Исповедницы Русския Истинныя Церкве, / подобно первым христианом / понесли есте подвиг служения катакомбнаго, / претерпели есте гонения, заточения и лишения бездомнаго жития, / молитеся Владыце Христу,/ да и нам дарует вашу крепость / в час испытаний не отвергнутися Истины / и купно с вами сподобитися жизни вечныя.

Ин тропарь, Глаc 2-й:

Гласа вашего тихаго/ яко грома чистительнаго правители убояшася:/ малым бо  числом, но многою силою духовною/ паству Российскую управили есте,/ и яко звезды/ на темном небе безбожия просияли есте,/ темже вам возопиим: /рaдуйтеся, слaвнии отцы, исповедницы новии!

По 1-м стихословии седален, Глас 1-й:

Собор святых отец исповедник катакомбных, богоноснии отцы наши, молим вы прилежно, сохраните от бурь и искушений стадо ваше, и путь правый богоподобия нам указуя, распалайте ны ко Господу любовию, во еже спастися воспевающим вас.

Слава и ныне, Богородичен:

Святейшая святых всех сил, Честнейшая всея твари, Богородице, спаси ны, Спаса Рождшая, от прегрешений тмочисленных и бед, яко Благая, молитвами Твоими.

По 2-м стихословии седален, Глас 5-й:

Радуются вси вернии, и Церковь Русская ликует, празднующи Собор святых исповедник, подвижник катакомбных, их бо житием украсися, юже Господь таковыми столпы утверди, тех молитвами да подаст благодать Свою ко спасению душ наших.

Слава и ныне, Богородичен:

Утоли болезни многовоздыхающих душ наших, Утолившая всякую слезу от лица земли: Ты бо человеков болезни отгоняеши, и грешных скорби разрешаеши, Тебе бо вси стяжахом надежду и утверждение, Пресвятая Мати Дево.

Полиелей и величание:

Величаем вас, святи отцы-исповедницы и чтим святую память вашу, вы бо молите за нас Христа Бога нашего.

Псалом избранный: Бог нам прибежище и сила:

Седален, Глас 1-й:

Яко любящим Бога вам, о исповедницы новии, вся претерпенная на земли быша во благая. И пришли есте, яко избрании, к обетованному наследию вечных благ. Слава Давшему вам крепость, слава Венчавшему вас, слава содевающему вами спасение наше.

Слава и ныне, Глас тойже: Гавриилу вещавшу Тебе, Дево, радуйся…

Прокимен святых, Глас 4-й:

Радуйтеся праведнии о Господе, правым подобает похвала.

Стих: Исповедайтеся Господеви, яко благ, яко в век милость Его.

Всякое дыхание:

Евангелие от Луки, зач. 64-е.

Псалом 50

Слава: Молитвами отцев-исповедников, Милостиве, очиcти множество согрешений наших.

И ныне: Молитвами Богородицы, Милостивее, очисти множество прегрешений наших.

Помилуй мя, Боже, по велицей милости Твоей и по множеству щедрот Твоих очисти беззаконие мое.

Стихира, Глас 6:

Отчаянии есмы жития ради и не имамы нрава добродетельна, но яко приносим Ти молитвы святых сродник наших, не отвержи ны, Господи, утверди Церковь Русскую, не презри слезы верных сынов, колена пред ваалом не преклонивших, но прими ны, кающиеся, святых твоих мольбами.

Канон, Глас 4-й, его же краестрочиие: О Дивное Чудо! Церковь Истинная Утвердися.

Песнь 1

ирмос: Отверзу уста моя, и наполнятся духа, и слово отрыгну Царице Матери, и явлюся светло торжествуя, и воспою, радуяся, тоя чудеса.

Припев: Святии отцы исповедницы, молите Бога о нас!

Отверзу уста моя недостойная, да воспою сонм святых отец исповедник Церкви нашея, ихже изнесе Русской земли всяко место и страна, и яже Церковь русская издревле воспита. Сей сонм много притерпе и венцы от Бога прием, ныне о всех нас вкупе хвалу и песнь принесет единому Владыце.

Днесь вси в песнех духовных воспоим святыя отцы и подвижницы катакомбныя, ибо тесноту велию и гонения за Церковь Христову претерпесте, молите утвердитися ей незыблемей и непоколебимей до скончания века.

Истину Христову паче всего возлюби, о святителю Петре, и в уделе Божией Матери в объятия Отчи припаде;  яко преподобный Антоний, благословение Святыя Горы в Россию самому святителю Тихону принесе, и страданием дерзновение ко Господу приобретши, молися Ему, да и мы, егда найдет на ны испытания час, мужества дар Божий восприимем.

Волцы безбожнаго нечестия и волцы в овечьей одежде сергиева обмана тщахуся потопити корабль Церкви Русския, ты же исповедниче Петре, странныя догматы, чуждия же Церкве Христовы изгнал еси, о Святей Церкви истинно богословил еси, и ныне в вышних Богови предстоя, нас, чтущих тя, поминай.

Богородичен:

Ныне с чинми ангел, Владычице, со пророки и апостолы, и с новомученики и всеми святыми земли нашея за ны, грешныя, помолися, под твой покров непрестанно прибегающия.

Песнь 3

ирмос: Твоя песнословцы Богородице, живый и независтный источниче, лик себе совокупльшия духовно утверди, в Божественней Твоей славе венцев славы сподоби.

О священномучениче Прокопие, архипастырю Одесский, ныне тя похвальными венцы венчаем, совокупно с иереем Иоанном, яко звезды небесныя на тверди церковней просиявшии, вы бо мрежею учений ваших многих верных ко Христу уловивше, вкупе проповедовали Христа, вкупе и смерть за Него прияли есте, и днесь на небесех вкупе молитеся о любовию воспевающих вас.

Единство в Истине свято соблюдая, в един день приняли смерть за Христа, единую же и награду от Христа стяжали есте, о Священномученицы Кирилле и Иосифе! Днесь и вас воспети подобает, ибо чада ваша духовная в лице исповедническом прославляются и с вами вкупе Господа молят о чтущих память вашу.

Четырежде раз заключения приемля и вся попечения житейская нивочтоже вменяя, вкупе с супружницею своею образ иноческий приял еси, преподобне отче Тимофее, благословение на тайное служение от Схиепископа Петра имеяй, пасе духовное стадо в Ташкенте, а по ссылке в земли Сибирстей, Казахстанстей и Башкирстей,  вкупе с паствою гонения претерпе, с ними со дерзновенным исповеданием Небесных врат достигл еси.

Богородичен:

Украшается Церковь наша иконою Богоматери Иверскою Благоухающею, от тоя чудесную помощь приемлюще и источник утешения в ней обретающе, и нам, Благая Вратарница, двери райския отверзи.

Седален, Глас 6-й:

Заветы новомучеников восприемше, души ваша за паству положили есте, больши сия любви никтоже имать. Сия есть заповедь Господня, юже исполнисте, да любите друг друга, якоже Он возлюбих ны. Сего ради прииде к ним Господь и обитель у них сотвори, в нюже и нас внидети сподоби, Всещедре Владыко.

Слава и ныне, Богородичен:

Не имамы иныя помощи, не имамы иныя надежды, разве Тебе Владычице, Ты нам помози, на Тебе надеемся и Тобою хвалимся, Твои бо есмы раби, да не постыдимся.

Песнь 4

ирмос: Седяй в славе, на престоле Божества, во облаце легце прииде Иисус Пребожественный, нетленною дланию, и спасе зовущия: слава Христе, силе Твоей.

Днесь прославим отца нашего Михаила, рукоположение от Священномученика Иосифа в Петрограде приявшаго и стопам его за братом своим, новомучеником Измаилом, последовавшаго, ссылки и заключения претерпевшаго. Ныне же, в лике исповедник водворяющеся, молися со братом и с наставником твоим о чтущих память вашу.

О преподобнии Отцы исповедницы Тихоне и Клавдие! Подвиги иноческия на пути исповедничества не оставили есте, в послушании святителю мученику Иосифу пребывая, в Петрограде и в землях Новгородских и Латвийских тайно священнодействуя, с чадами своими горний Иерусалим взыскуя, и ныне в обителях райских пребывая, тепле молите Христа Бога спастися душам нашим.

Церкви московския истинные пастырие: Владимiре, Серафиме, Димитрие, Сергие и Владимiре! Ничтоже возможе разлучити вас, богоприятнии, от любви Христовы: ни скорбь, ни гонение, ни муки, вся бо сия силою Возлюбльшаго вас Господа препобедили есте и вся разженныя стрелы лукаваго угасили есте щитом веры Православныя.

Богородичен:

Евангелия Христова богогласный списатель Лука написа образ твой, Владычице, и в нем Заступнице Теплая земле нашей была еси, и ныне призри на нас, и скорби наша видевши и воздыхания услышавши, знамение милости яви нам, Пречистая.

Песнь 5

ирмос: Ужасошася всяческая о Божественней славе Твоей: Ты бо Неискусобрачная Дево, имела еси во утробе над всеми Бога, и родила еси безлетнаго Сына, всем воспевающим Тя мир подавающая.

Радуйся, отче наш Священномучениче Сергие, мечем веры теплохладность посекающий, любви и сострадания исполненный, стопам отца своего Алексия последовавый, паству его яко духовное наследие восприял еси, и, яко Учитель Божественный, новым Каиафой преданный, за правду церковную жертву живую Учителю себя самаго принесе, сего ради плоды веры, чада церковная, возрастил еси.

Како возвеличим тя, славный граде Воронеже! В тебе бо святитель Митрофан первее не убояся исповедати чистоту веры пред царем. Яко стольный град для мiрских владык, тако ты для владык и отцев Церкве Истинныя был еси, прибежищем бо явился катакомбных отец, хранителей Истины сохранил еси, да ключи церковныя в лихолетие сохраньше, верным чадам их невредимы предадут.

О воронежскии пастырие, адаманты веры истинныя: преподобнии Иларионе, Игнатие, Никандре, Амвросие, Тихоне и Антоние, николиже от Правыя Веры отступившии, но яко нить златую и сокровище многоценное преемство от архиереев истинных сохранившии; егда бо нигдеже обретосте епископа, на себя иго правления церковнаго приясте; будете и нам заступницы и ходатаи, да и мы разумеем, что есть отрада Господня.

Богородичен:

Всечестную икону Твою Иверскую, юже Церковь наша яко некий дар божественный свыше прият: присно покрывай и заступай ю, О Госпоже Царице Богородице, спасающи ны от всех навет вражиих.

Песнь 6

ирмос: Божественное и всечестное совершающе празднество, богомудрии, Богоматере, приидите руками восплещем, от Нея рождшагося Бога славим.

Иже Церкве Русския колыбель еси, о граде Киеве, днесь прославляем пастыри твоя Димитрия, Андрея и Владимiра, наставницем своим новомученицем подражавшии, истинную веру до конца соблюдшии в лютая времена земли нашея; и ныне страстотерпцы славнии, всех подвизаете к славе и хвалению Бога, во спасение душ наших.

Святый исповедниче Алексие, истину Православия верным возвещая, у престола Всевышняго за чад предстоя, в земли Кубанстей стадо церковное верно паствил еси, нивочтоже опальство безбожныя власти вменив, узы и лишения за Христа претерпел еси, сего ради и ныне дерзновенно молися Единому Царю мира любовию вас чтущих верным Христу до конца быти.

Троице Живоначальней на ниве белорусския Церкве работасте, о Павле премудре и Феодоре боголюбиве, со чадами вашими: Антипой и Герасимом верными, и Елисеем, Антонием, Василием и Димитрием, поборницы правды церковной, слезами и кровьми вашими землю сию напоили есте, да доднесь Владыце Христу плоды благоприятны приносит.

Богородичен:

Иже от Тебе рождейся, Пресвятая Дево, и ко Отцу вознесыйся, Духа Святаго ниспославый на всяку плоть, и Церковь Свою утвердивый, освяти, прослави и приими в селения Своя верных служителей сих, с нимиже не престай молящи за чтущих Тя.

Кондак, Глас 5-й:

Славнии Отцы-Исповедницы / Русския Церкве Катакомбныя, / ради пастырскаго служения не пожалевшии себя, / но закон Христов начертавшии на сердцах своих, /паче живота возлюбившии Христа, / любовию напояли есте Его верныя чада, / молитеся ко Христу, Господу нашему, / да и мы Его ради презрим временную жизнь / и сподобимся жизни вечныя.

Икос:

Егда найде час испытаний на землю Русскую, / и враг воздвиг гонения на веру истинную,/ овыя чада Церкви прияша смерть за Христа, / овыя разсеялися в иныя земли, / овыя подъяша крест служения катакомбнаго, / к ним же днесь, яко некогда пастырие, в разсеянии сущии, возопиим: Радуйтеся, несокрушимыя Исповедницы веры Христовой: радуйтеся, вы бо есте старшии братия и заступницы наша. Радуйтеся, вы бо свет во гресех и тьме заблуждшаго мiра: радуйтеся, вы бо соль земли нашея. Радуйтеся, вас ради терпяше Господь годы безбожия на Руси: радуйтеся, губителя человеков погибель и наша победа. Радуйтеся, сладкое утешение паствы: радуйтеся, днесь благоговеют пред вами пастырие. Радуйтеся, тайное житие избравшии: радуйтеся, служение втайне от князя мiра сего совершавшии. Радуйтеся, прияли бо есте благословение Святителей-Мучеников: радуйтеся, стали бо есте образом верности для нас. Радуйтеся, славнии Отцы-Исповедницы / Русския Церкве Катакомбныя!

Песнь 7

Ирмос: Не послужиша твари богомудрии паче создавшаго, но огненное прещение мужески поправше, радовахуся поюще: препетый отцев Господь и Бог благословен еси.

Ныне тя воспоем, дивный старче Феодосие, яко един от древних в горах кавказских подвизаяся, дары духовныя от людстей славы и Церковь Истинную от безбожных гонителей путем юродства сокрывал еси, и ныне Господу на небесех радуешися поюще: препетый отцев Господь и Бог благословен еси.

Наставниче наш, о Назарие кроткий, яко стену недвижиму истинную веру соблюдший, в ней же пребысть до скончания жития своего, чадам духовным оную проповедавый, в земли Харьковской и Сумской подвизался еси, ныне несредственне Христу за нас предстояще, радуешеся поюще: препетый отцев Господь и Бог благословен еси.

Антоние и Макарие, со Агапитом, Феодосием и Амфилохием, новые преподобнии Киево-Печерстии, проповедуют преславно, ангельский образ и веру Христову противу учений мiра сего яко щит держащии, и нам образ терпения и злостраданий достойно являюще, радуются поюще: препетый отцев Господь и Бог благословен еси.

Богородичен:

Яже мiру рождшая спасение, радуйся, Благословенная, покрове и державо, стено и утверждение отцем нашим, поющим: препетый отцев Господь и Бог благословен еси.

Песнь 8

ирмос: Отроки благочестивыя в пещи рождество Богородичо спасло есть: тогда убо образуемое, ныне же действуемое, вселенную всю воздвизает пети тебе: Господа пойте дела и превозносите Его во вся веки.

Яко звезды великия просияша в харьковстем крае, о Никито чадолюбивый, велию паству подле себе собравый, и Серафиме, слуго Божией Матере преданнейший;  яко лучами, сияюще добродетельми, ныне в вечнем граде Небесного Царя Господа пойте дела и превозносите Его во вся веки.

Ум к Богу непрестанно вознося, плач непрестанный стяжал еси, преподобне отче наш Тихоне, писаньями отеческими души наша снабдил еси, основание твердо подвигам, камень краеугольный Христа, положил еси, и ныне, премудрость высшую созерцая, Господа поеши дела и превозносиши Его во вся веки.

Трапезы Господней частый причастник по завету кронштадтскаго пастыря был еси, и Евангелие Христово всем усердно проповедуя, новый Алипие преподобный, старче Черниговский, злобы безбожных не убоялся еси, огнем любве Божественныя тыя препобедив, Господа поеши дела и превозносиши Его во вся веки.

Вольную нищету и скитания избрал еси, преподобне исповедниче Филарете, невольный затворниче, храм Богу сердце твое устроиши, непрестанно зовя ему: Господа пойте дела и превозносите Его во вся веки.

Богородичен:

Единаго от Троицы родила еси, Пречистая, милосердия ради на земли Явльшагося, Егоже непрестанно моли, да утвердится Церковь Истинная Православная во спасение душ наших.

Песнь 9

ирмос: Всяк земнородный да взыграется духом просвещаем, да торжествует же безплотных умов естество, почитающее священное торжество Богоматере, и да вопиет, радуйся Всеблаженная Богородице, Чистая Приснодево.

Радуйся, земле Сибирская, славнии бо Александр и Пимен окормляху чада твоя, гонения и заточения претерпевая, не щадяху себе ради паствы своея, но любовь велию к чадам духовным стяжавше, забываху о себе в попечениех о пастве своей; тако и ныне, отцы святии, не престайте о нас молящи Христа Бога нашего.

Днесь прославим Соловецкия обители узника, тамо быв иночествующих покровителю, новомучениками наставляемь бе, обман сергиев не приемый, тайно скитался еси в чувашском крае, коегожде наставляя на путь спасения. Сего ради зовем ти: радуйся отче Филиппе премудре, священный наш учителю.

Иже в Тамбове тайное служение совершаше, о Серафиме, церковная похвало! Врачевал еси недуги душевные и телесные, клевету, узы, страдания и суд неправедный от беззаконных мужественне претерпел еси. Темже Христу, святе, молися даровати Церкви нашей мир и велию милость.

Славим велиции сродницы наши, именованнии и безыменнии, явленнии и неявленнии, небеснаго Сиона достигшии и славу многу от Бога примшии, в лета последняя страданьми и трудами подражателие первым христианам явистеся, утешение наше, в скорби сущим, веру нашу укрепити и люди расточенныя соберите, от нас, яко дар, песнь благодарение приемлюще.

Богородичен:

Яже паче ума и естества Бога рождши, Неискусомужная Марие, стена необоримая и покров всемощный новомученикам и исповедникам катакомбным явилася еси, о Пресвятая Дево, темже Тя величаем.

Светилен:

Христе, Свете Тихий Солнца Правды Незаходимый, молитвами сонма исповедников сих сердца наша просвети и Царствия Невечерняго Твоего нас сподоби.

Стихиры на Хвалитех. Глас 6-й подобен «Тридневен»:

Столпи непоколебимии Церкви бысте, гонения от безбожных претерпевше, правду о Церкви хранивше, святии исповедницы катакомбныя, паству вашу ко Христу приведшии, темже вас любовию почитаем.

Душевныя муки и лишения потерпесте, клевету от бывшей братии понесосте, огнем ревности и духом кротости чад ваших наставляя. Сии подвизи отверзоша вам врата жизни вечныя. Ея же и нам испросите у Бога, святии!

Ангели трудам вашим дивляхуся, вы бо от братии по плоти гонения претерпесте, несть ваша брань противу плоти и крови, но к мiродержителю тьмы века сего. И ныне Христу, святии, молитеся даровати Церкви мир и велию милость.

Вернии Богу, Церкви и Царю пребысте, святии исповедницы катакомбнии, и ныне с лики новомученик и всех святых русских предстоите Христу Царю, молитеся с ними прилежно, да утвердится Церковь Православная Истинная.

Слава, Глас 8-й:

На сем камене созижду Церковь Мою, и врата адова не одолеют ей, рекл еси, Господи, о вере Петровой. Сию же веру исповедаху отцы наши, и запечатлеше ея подвигом крестным, терпением стяжасте души своя. И яко Петр глаголасте: Господи, Ты вся веси, Ты веси, яко любим Тя. Глагола им Господь: пасите овцы моя, пасите агнцы моя. Темже и мы, чада ваша, воспеваем подвиги и болезни ваша, и просим заступления пред престолом Всывышнего, да Милостив будет и нам в день судный.

И ныне, Богородичен.

На Литургии:

Прокимен, Глас 4-й: Святым, иже суть на земли Его, удиви Господь вся хотения Своя в них.

Стих: Сохрани мя, Господи, яко на Тя уповах.

Апостол святых: к Колоссаем, зач. 256 от полу.

Аллилуия, Глас 1-й:

Стих: Боже, ушима нашима услышахом, и отцы наши возвестиша нам.

Стих 2: Спасл еси нас от стужающих нам и ненавидящих нас посрамил еси.

Евангелие от Луки, зач. 67.

Причастен: Благоволит Господь в людех Своих и вознесет кроткия во спасение.

Молитва

Собору Святых Отец  Исповедник Церкве Катакомбныя

О новии угодницы Божии, Исповедницы Русския Церкве Катакомбныя! Ныне вас возвеличим, унижения бо претерпесте; вас восхвалим, поругание бо смиренно приясте; вас поставим яко светильник на свещнице, сокровенно бо и тайно служисте; вас похвалами изукрасим, избиени бо бысте; вам покланяемся, в трудех согбени бо бысте; в словесныя одежды светлыя облечем, наготу бо и нищету понесосте; со святыми воспоем, с разбойниками бо и татями в заточениях водворястеся; вас у Престола Божия мысленно зрим, лишения бо до конца претерпесте и спасение обретосте. Любы ваша богоподражательной явися: паству свою, яко Пастырь добрый, паче всего возлюбисте и ея ради небрегосте о животе своем, но гонения претерпевая, все житие свое и себе самех предаша чадам своим; сего ради житие ваше мук и странствий невольных, скорбей и лишений исполнися. Вы же вся сия нивочтоже вменяя, в трудех неусыпных велее утешение обретосте, в скорбех радость о чадех своих стяжасте, вся муки сия за блаженство вменисте, ибо службу Божию совершисте и души своя за други своя положисте. Сия любы есть совершенная, более сей несть на земли – рече Спаситель. Сию любовь вы стяжасте, о святии Отцы-Исповедницы! Юже и нам у Господа испросите, да и мы, подвиги вашими вдохновляеми, не убоимся в последняя времена ни сильных мiра сего, ни врага, ни лишений, ни гонений, ни самыя смерти за веру Христову и за ближния своя, но до конца верными Господеви пребудем и сподобимся жизни вечныя. Аминь.

Дополнительно см.:

1. Слово на прославление Святителя Филарета (Вознесенского) и Отцов-Исповедников Катакомбной Церкви

http://catacomb.org.ua/modules.php?name=Pages&go=page&pid=1472

2. Акт о соборном прославлении во святых Отцов-Исповедников Русской Церкви Катакомбной

http://catacomb.org.ua/modules.php?name=Pages&go=page&pid=1471

3. Доклад по вопросу прославления Отцов-Исповедников и Мучеников Катакомбных
    Комиссия по канонизации при Архиерейском Синоде РИПЦ

http://catacomb.org.ua/modules.php?name=Pages&go=page&pid=1462

4. О причислении к лику святых Отцов-исповедников Катакомбной Церкви
    С.М. Авласович, кандидат филологических наук, г. Омск, РИПЦ

http://catacomb.org.ua/modules.php?name=Pages&go=page&pid=1483

5. Смысл богослужебного прославления новомучеников и исповедников Святой Православной Церковью

http://catacomb.org.ua/modules.php?name=Pages&go=page&pid=1482

6. К прославлению Освященным Собором РИПЦ Святителя Филарета (Вознесенского) и Отцев-Исповедников Церкви Катакомбной
    Протодиакон Герман Иванов-Тринадцатый, г. Лион, Франция

http://catacomb.org.ua/modules.php?name=Pages&go=page&pid=1469